Аброр Бахтиёровичнинг кулгу кечасидан

12 ноябрь куни Comedy.Uz жамоасининг раҳбари Аброр Бахтиёрович бошчилигида Зарафшон концерт залида кулгу кечаси бўлиб ўтди. Бугунги кунда мухлисларнинг кулдиришга бел боғлаган кулгу жамоалари талайгина. Улар орасида Comedy.Uz жамоасининг ҳазиллари бутун оила бўлиб томоша қилинадиган, ортиқча бачканаликдан йироқ бўлган самимий ҳазиллардан иборатдир.

Йиғилганлар самимий ва файзли кулгу кечаси гувоҳи бўлишди. Белгиланган вақтидан бироз кеч бошланган кечага Comedy.Uz резиденти Миршакар Файзуллаев бошловчилик қилди. Аброр Бахтиёрович, ҳамда Миршакар Файзуллаевнинг «коса тагида ним коса» тариқасидаги сўз ўйинлари уларнинг яккахон кулгу устаси сифатида шаклланганлигини кўрсатиб берди. Энг муҳими бу ҳазилларнинг ҳеч бирида ортиқчалик ёки зўрма зўракилик йўқ эди.

Дастур бошланиши сўз ўйинлари билан бошланган бўлса давомийлиги унданда қизиқ бўлди. Бахтиёрович кечага таклиф қилинган машҳур меҳмонлардан ҳам жуда ўринли фойдалана олди.

Хусусан кечада меҳмон бўлиб ўтирган хонанда Абдулла Қурбонов жонли ижрода «Жонон бўламан деб» номланган таронани куйлашини илтимос қилган Бахтиёрович, раққоса Шодиёра Омоновани ушбу қўшиққа рақсга тушишга ҳам кўндира олди.

Аброр Бахтиёрович бирин кетин жуда ҳам қийин саҳна кўринишларидан бир «Ҳайвонот боғида бола билан сайр», Олим Ака ва қизиқчи Зокир Очилдиевлар билан чиқишлари ва ичак узди ҳазиллар жуда ҳам пухта ўйланган ва ҳар жиҳатдан оргинал ҳазиллардан иборат бўлди.

Comedy.Uzнинг давомчилари бўлмиш Зарафшон шаҳридан келган йигитлар билан 3 дақиқанинг ичида тезлаштирилган тўй томошаси саҳналаштирилди.

Дунёга машҳур брендлар аслида ўзбек тилидан, шеваларидан ўзлаштирилганлигига ишонасизми. Бўлмаган гап дейишга шошилманг, чунки бундай машҳур брендлар аслида, ҳақиқатдан ҳам ўзимизда ўйлаб топилганини ажойиб кулгу йўли ва суратлар билан Бахтиёрович мухлисларни исботлай олди.

Ўзбекистон ва Қорақалпоғистон халқ артисти Ғуломжон Ёқубовнинг дастурга келиши мухлисларга ажойиб мусиқий кайфият улаша олди. Хонанда ижросидаги «Сенинг кулишларинг» таронаси мухлислар томонидан жўрликда куйланди.

Аброр Бахтиёрович, ҳамда Хасан ва Хусан триосидаги Азаматнинг биргаликдаги «Куйни топ» деб номланган кўрсатувга тақлидан тайёрланган саҳна кўриниши мухлислар томонидан жуда ҳам кўтаринки кайфият билан кутиб олинди. Бу кўриниш учун мухлислар орасидан кўнгилли иштирокчилар саралаб олинди ва улар ўзларига топширилган вазифани аъло даражада уддалашди.

Бугунги кундаги энг хит тароналарга Бахтиёрович томонидан ажойиб, кулгуга бой клиплар тўплами тайёрланган бўлиб, бу клиплар катта мониторда намойиш қилинди. Мазкур саҳна кўриниши ҳам жуда яхши кутиб олинди.

«Бек» доирачи йигитлари, ҳамда Бахтиёровичнинг биргаликда тайёрлаган саҳна кўриниши эса бу йўналишда ажойиб янгилик бўлди.

Концерт дастури узоқ давом этган бўлишига қарамасдан мухлислар дастурни охиригача кўтаринки кайфият билан томоша қилиб ўтиришди. Аброр Бахтиёрович мухлисларнинг диққатини баланд нуқтада ва кўтаринки кайфиятда ушлаб тура олди.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.