Ботир Қодиров ва раққоса Паризода Хитойда
Хитой пойтахти Пекинда 1 октябрда Халқаро туризм фестивали очилди. Ўн саккизинчи бор ташкил этилган фестивалда Ўзбекистон делегацияси ҳам иштирок этмоқда. Ўзбекистон делегацияси таркибидан хонанда Ботир Қодиров, «Сирдарё наволари» рақс дастаси ва таниқли раққоса Паризодадан иборат ансамбль ҳам ўрин олган. Бу ҳақда daryo.uz хабар берган.
«Пекин халқаро фестивалида 24 мамлакатдан 200дан зиёд санъаткорлар қатнашмоқда. Ўрта Осиёдан фақат Ўзбекистон санъаткорлари таклиф этилган», - дейди Ботир Қодировнинг продюсери.
Фестивальнинг очилиш маросими Пекиндаги Халқаро олимпия майдонида бўлиб ўтган. Унда шаҳар расмийлари, меҳмонлар, шунингдек, Ўзбекистоннинг Хитойдаги элчихонаси ходимлари ҳам қатнашган.
«Ботир Қодиров бошчилигидаги ижодий гуруҳ Хитой санъаткорларидан кейин биринчи бўлиб саҳнага чиқди. Очилиш маросими мусиқий парадга уланиб кетди. Фестиваль меҳмонлари миллий санъатимиздан баҳраманд бўлиб, санъаткорларимизни олқишламоқда», - дея қўшимча қилди Аброр Пўлатов.
Эслатиб ўтамиз, хонанда Ботир Қодиров жорий йилнинг 1-6 ноябр кунлари Истиқлол санъат саройида ўзининг яккахон концерт дастурини тақдим этади.
расмий каналимизга обуна бўлинг!
ИЗОҲЛАР 0