DJ Ochilдан Aziz Yurtim альбоми

DJ Ochil – Тошкент клуб ҳаётидаги энг ёрқин юлдузлардан бири. У мана бир неча йилдирки бутун мамлакатимиз бўйлаб рақс майдончалари ва ёрқин байрам оқшомларини қиздириб келмоқда. Яқинда DJ Ochil ўзининг "Aziz Yurtim" номли дискини тақдим этди. Ундан тингловчиларга яхши таниш ва севимли ўзбек хитлари жой олган. Яъни энг машҳур хит тароналар замонавий сайқалланган оҳангларда жаранг сочади.  

DJ Ochil ўз альбоми ҳақида шундай дейди:

- Мен аллақачон машҳурликка эришган ва қалблардан жой эгаллаган ўзбек хитларининг ремиксини яратишга қарор қилдим. Аслини олганда менга ўтган йиллар хитларига ультразамонавий клуб оҳангларини сайқаллаштириш ва уларнинг аудиториясини кенгайтириш, “Урф”га кирган клубларга олиб чиқиш қизиқ бўлиб туюлди.

- Менинг бу таклифимга биринчилардан бўлиб Рашид Холиқов розилигини билдирди ва шу йўл билан ўзининг "Азиз юртим" номли композициясига қайта янгилик киритишни хоҳлади. Кейинчалик эса бу ғояни  DJ Piligrim ҳам қўллаб қувватлади. Бу менинг муаллифлик альбомим эмас, бу мини-альбом бўлиб, у оммавий сотувга чиқарилиши режалаштирилмаган. Буни мен демо версия деган бўлардим. Мазкур альбомда 8та трек бўлиб, ҳар битта композицияга радио версияни ҳисобга олганда 2тадан трек тўғри келади. Треклардан бири умумий  mix бўлиб, Soulful (House) услубида ишланган ва у бир соатдан ортиқ давом этади.

- Мен баҳорда, яъни Наврўз байрамига тўлақонли 15та трекдан иборат альбом чиқаришни режалаштирганман. Унга Шаҳзода, Севара Назархон, “Ялла” гуруҳи, Райҳон ва бошқаларнинг энг яхши хитлари киритилади. Яъни барча хонандалар менинг ғоямни қўллаб-қувватласалар, албатта ремикслар альбомини чиқариш режамда бор. 

Азизлар, DJ Ochilнинг "Азиз юртим" альбомидан жой олган микслар эътиборингизда. Замонавий сайқал берилган ўзбек хитларини тингланг ва кайфиятингизни кўтаринг.