Гулсанам Мамазоитованинг концертига тайёргарлик

Темирйўлчилар марказий маданият саройида Ўзбекистон халқ артисти Гулсанам Мамазоитованинг янги 2016 йилги концерт олди тайёргарлик жараёнлари бўлиб ўтмоқда. Куни кеча, яъни 3 феврал куни биз ҳам хонанданинг репетициясини кузатдик. Репетиция жараёнига ташрифимиздан фойдаланиб, Гулсанам Мамазоитовани сўзга чорлаб, концертга оид бир неча саволларимизни бердик.

Концерти ҳақида у шундай дейди: 

“Кўриб турганингиздек, концерт дастурига тайёргарлик жараёни қизғин кетмоқда. Концерт жонли бўлганлиги учун асосий урғуни қўшиқларга қаратяпмиз. Лекин режиссура тарафдан ҳам мана Рустам ака жуда кўп янгиликлар ўйлаяптилар. Бунда тарихий сиймолар ҳам акс эттирилган. Классик шоирларнинг ғазалларидан қўшиқлар ижро этамиз. Хусусан 9 феврал буюк мутафаккир, аллома Алишер Навоий таваллудига бағишлаб, Навоий ғазалларидан ҳам қўшиқлар куйлаймиз. Бундан ташқари концерт дастуридан шўх қўшиқлар, дуэтлар, ҳамда болажонлар билан ижро этиладиган янги қўшиқлар ҳам ўрин эгаллаган. Шунингдек, ўзимнинг муаллифлик қўшиғим ҳам бор, у "Келгай” ғазаллари билан ижро этилиб, мухлислар ҳукмига ҳавола этилади. Концертда жами 23та қўшиқ бўлади. Уларнинг кўпчилиги янги қўшиқлар, лекин аввалги қўшиқларни ҳам ижро этамиз, бусиз бўлмайди, албатта. Дастурда асосан мавзуларга эътибор қаратдик. Масалан, “Давлат бергин йигитга”, “Тун”, шу билан бирга Ватанни мадҳ этадиган қўшиқларимиз ҳам бор. Концертда иккита хонанда билан дуэт куйладим. Ҳозирча буни айтолмайман. Томошабинларга тайёрланган совғалар жуда кўп. Бу ҳам сир. Буларни эса  концертга ташриф буюрган мухлислар билиб олишади. Барчани концерт дастурига таклиф этамиз”. 

2016 йилдаги хонанданинг “Мен сизни топгунимча” номли концертининг режиссёри Ўзбекистон Республикасида Хизмат кўрсатган санъат арбоби Рустам Шамсутдинов Динамович.

Гулсанам Мамазоитова ўзининг созандалари ва ижодий жамоасининг тайёргарлик жараёнида хонанда Фаррух Раимовни  учратдик ва уни суҳбатга чорладик. 
“Биринчи навбатда шуни айтишим мумкинки, Гулсанам Мамазоитова ва Отабек Муҳаммадзоҳид устозларни жуда ҳурмат қиламан. Буларни ижодини ўша ёшлик вақтларидан “Ажаб, ажаб” қўшиқларидан бошлаб, уларнинг мухлисига айланганман. Шу инсонларни ўзимга устоз деб билганман. Бугунги кунда эса Гулсанам Мамазоитованинг концерт дастурига тайёргарлик жараёнида бевосита иштирок этаётганим, ҳамда бу инсон билан дуэт куйлаганимдан жуда хурсандман. Бу инсон жуда самимий, оқкўнгил. Дуэт айтайлик деган таклифни мен берганимда, рад жавобини эмас балки, бирданига рози бўлганлар. Ёш бўлсамда менга ишонч билдирганларидан жуда таъсирланганман. Концертга бир ойдан бери тайёргарлик кўряпмиз. Мақсадимиз эса битта, фақат мухлисларга манзур бўладиган қўшиқлар, кўринишларни чиқариб бериш. Ўйлайманки, концерт барчага ёқади” - дейди хонанда Фаррух Раимов. 

Ҳа юқорида Гулсанам Мамазоитова дуэтдошларини сир тутган бўлсалар, хонанда Фаррух Раимов бир оз бу сирни ошкор этиб қуйдилар. Демак, дуэтдошларининг бирининг кимлиги маълум, аммо иккинчи дуэтдош қайси хонандалиги маълум эмас. Гулсанам Мамазоитова томонидан тақдим этилажак барча туҳфалар концерт кунлари мухлисларга ошкор бўлади. 
Эслатиб ўтамиз, Ўзбекистон Халқ артисти Гулсанам Мамазоитованинг 2016 йилдаги концерт дастури  “Мен сизни топгунимча” деб номланган бўлиб, 9-13 февралгача бўлиб ўтади. 
 

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.