Концертлар ва шоу
Fevralda kutilayotgan 5 ta konsert
00:00
Now playing
Выберите радиостанцию
Концертлар ва шоу
Манзуранинг 18 йиллик ижод сарҳисоби
Қиш фаслининг сўнгги ойи ташриф буюрган кун, яъни 1 феврал куни хушовоз хонанда Манзуранинг "Истиқлол" санъат саройидаги илк яккахон концертига старт берилди. Хонанданинг ўзи ушбу кунни санъатдаги балоғат ёшга етган куни деб таърифлади. Концерт ваъда қилинганидек романтик шоу тарзида бошланди.
Концертда нафақат Манзуранинг, балки раққос ва раққосаларнинг саҳна либосларига ҳам жуда жидий ёндошилгани концертнинг илк дақиқаларидан маълум бўлди.
Пардалар кўтарилиб, саҳнада Манзура раққослар билан биргаликда пайдо бўлди. Уни мухлислари қанчалар интиқлик билан кутишганини гулдирос қарсаклар ва қийқириқлардан англаб олиш мумкин эди.
Аввал хабар берганимиздек концертнинг шартли номи "Асра бахтимизни" бўлиб, Манзура концерт дастурини айнан шу қўшиқ билан бошлади.
Раққос ва раққосалар нафақат саҳнада хиром айлаб, балки залга мухлислар ёнига тушиб ҳам ташриф буюрганларни хушнуд этдилар. Концерт ташкилотчилари ўйлаб топган "фишка"лардан яна бири ўтмиш ва бугунги кунни бирлаштиргани. Ўтган аср европача услубда кийинган раққосларнинг қўлларида "селфи"га тушиш учун мослама бўлиб, улар меҳмонлар билан ҳам бир йўла суратга тушиб олдилар.
Манзура концертга ташриф буюрган ота-онасига миннатдорчилик билдириб, улар ҳақида мухлисларга тўлқинланиб гапирди. Отасининг меҳрибонлиги, онасининг ҳар қандай вазиятда ҳам уни қўллаб-қувватлаши учун уларга алоҳида ташаккур изҳор этиб, гўзал гулдасталар тақдим этди.
Манзурани қўллаб-қувватлаш учун кўплаб санъат олами вакиллари ташриф буюрдилар. Улар орасида Абдурашид Йўлдошев, Шукрулло Исроилов, Достон Убайдуллаев, Гулсанам Мамазоитова, Рухшона, Ойбек ва Нигора, Умидахон, Гули Асалхўжаева, Шоира Отабекова, Мадина Мумтоз, Жасур Умиров, Тоҳир Усмонов, Шахзода Мухаммедова, Амира Алибекова, Тамилла ва Дилсўзларни кўриш мумкин эди.
Биринчи қисм якунида Акмал Мирзо, Жаҳонгир Позилжонов ва Даврон Кабулов ўзларининг ҳазиломуз чиқишлари билан ташриф буюрганларга янада кўтаринки руҳ бағишладилар. Улар ижросидаги ЖОНЛИ тарзда куйланган қўшиқ парчалари барчага бирдек манзур бўлди. Бу учлик "Гумдон" гуруҳи сифатида (албатта ҳазил сифатида) футбол бўйича Ўзбекистон терма жамоасига бағишлаб ҳам қўшиқ куйладилар.
Концертнинг иккинчи қисми ҳам хит тароналар жўрлигида ва кўтаринки кайфиятда ўтди.
Концертнинг иккинчи қисми якунида эса Манзурани қўллаб-қувватлаш мақсадида келган "Гап йўқ" триоси ўзларининг кулгили чиқишлари билан меҳмонлар кайфиятини кўтаришга ҳаракат қилдилар.
Концертнинг учинчи қисмини Манзура "Жонон бўламан деб" қўшиғини куйлаш билан бошлаб берди. Бу қўшиқ оҳангларига таниқли раққоса Малика Қурбонова ҳиром айлади. Сўнг бирин кетин миллий услубдаги қўшиқлар кетмакетлиги ижро этилди.
Концерт давомида Манзура бир қатор санъаткорлар билан ижро этилган дуэт қўшиқларини тақдим этди. "ЭлДиДо" гуруҳи, Улуғбек Раҳматуллаев, Жаҳонгир Позилжонов, Мавлуда Асалхўжаева шулар қаторидан.
18 йиллик ижод сарҳисобининг илк куни ниҳоясида Манзура Ватан ҳақидаги қўшиғини тақдим этди. Саҳнага барча иштирокчилар чиқиб келганларга миннатдорчилик билдирдилар.
Манзурани илк катта имтиҳондан муваффақиятли ўтгани билан табриклаб, концертнинг қолган кунларида ҳам омад ва куч-қувват тилаб қоламиз.
Манзуранинг концерт дастуридан тўлиқ фотоҳисоботни бу ерда кўришингиз мумкин.
Kunutun.uz нинг Telegram’даги расмий
каналига обуна бўлиб, янгиликлардан кунутун хабардор бўлинг.
Нашр санаси:
02-02-2015
Шошилманг
Оммавий ахборот воситаси давлат рўйхатидан ўтганлиги ҳақидаги гувоҳнома № 0942 ЎзМАА томонидан 09.01.2013да берилган
© 2013-2020 Барча ҳуқуқлар ҳимоя қилинган. Фотосуратлар, сайт дизайни (ташқи безаги),
муаллифлик материаллари, ёки сайтда жойлаштирилган бошқа ҳар қандай материаллардан
фойдаланиш фақат сайт маъмурияти рухсати билан амалга оширилади. Сайтдан маълумот руҳидаги
ҳар қандай материални олиб бошқа сайтда жойлаштирилганда манбага фаол ҳавола кўрсатилиши шарт.
ИЗОҲЛАР 0