Мавлуда ва Гули Асалхўжаеваларнинг концертидан
19 февралдан 21 февралга қадар "Истиқлол" санъат саройида опа-сингил Мавлуда ва Гули Асалхўжаеваларнинг "Ёнимда бўлишингиз бахт менга" номли концерт дастурлари бўлиб ўтди.
Ўзбекистонда Хизмат кўрсатган артист Мавлуда Асалхўжаева 8 йилдан буён яккахон концерт бермаган бўлиб, узоқ танаффусдан сўнг синглиси билан бир саҳнада мухлислари ҳукмига ажойиб концерт тақдим этди. Концертда иштирок этган мухлис сифатида ҳеч бир шубҳасиз, дастур яқин дўстлар, ҳамкасблар ва ашаддий мухлислар даврасида жуда ҳам чиройли ва файзли тарзда ўтганлигини айта оламиз.
Концерт дастурини гўзал актриса Дилноза Кубаева ва актёр Рихситилла Абдуллаевлар файзли тарзда олиб боришди.
Саҳнага биринчи бўлиб, катталик ҳурмати ила Мавлуда Асалхўжаева таклиф этилдилар. Зарпардалар очилар экан, жуда ҳам ёрқин декорациялар, катта экранлар ҳуллас муҳташам тарзда безалган саҳнани кўриш мумкин бўлди.
Муҳташам саҳна, ушбу куннинг мезбони Мавлуда Асалхўжаева мухлислари қаршисига чиққанларида тўла-тўкис бўлди. Мухлисларга илк қўшиқларини тақдим этганларидан сўнг, барча мухлислар билан саломлашиб, уларни жуда ҳам соғинганликларини айтиб, кеча давомида уларга ҳуш кайфият тиладилар.
Сўнг хонанда ижросида ҳаммага яхши таниш ва севимли қўшиқлар жаранг сочди. Қўшиқлар гўзал раққосаларнинг ҳироми ҳамоҳанглигида тақдим этилди.
Опа-сингиллар барча санъаткорлар сингари ушбу куни жуда ҳам гўзал кўринишда ва бир неча ҳил шохона либосларда намоён бўлишди. Бутун концерт давомида опа-сингиллар навбатма-навбат саҳнада ўз қишиқларини мухлисларига тақдим этишди.
Мавлуда Асалхўжаеванинг биринчи қисмдаги чиқишидан сўнг, дастур бошловчилари, яъни Дилноза Кубаева томонидан сўз мулкининг султони Мир Алишер Навоийнинг Гулига бағишлаб ёзган шеърий мисралари ўқиб эшиттирилган ҳолда Гули Асалхўжаева саҳнага таклиф этилди.
Гули Асалхўжаева мухлислари қаршисига Ватанни мадҳ этувчи қўшиқни ижро этган ҳолда чиқди. Қўшиқдан сўнг, Гули Асалхўжаева ҳам барча ташриф буюрганлар билан сўрашиб, ўзининг қўшиқларини ижро этди.
Албатта опа-сингилнинг биргаликдаги концертини, биргаликда куйланган дуэтсиз тасаввур этиб бўлмасди. Ҳа, ҳа саҳнада Мавлуда ва Гули Асалхўжаевалар ижросида болалик ҳақидаги "Болаликка қайтайлик" номли қўшиқ жаранг сочди.
“БОЛАЛИККА ҚАЙТАЙЛИК ОПА...
БОЛАЛИККА ҚАЙТАЙЛИК СИНГЛИМ... ”!
Концертда дастурида нафақат икки хонанда ўз мухлисларини, балки мухлислар ҳам ўзларининг севимли хонандаларини соғинганликларини кўриш мумкин бўлди.
Қўшиқларни ижро этиб мухлислар билан мулоқат қилишни унутмаган Мавлуда Асалхўжаева уларга шу даврада мухлислар қаторида ўтирган онаси йўқлигини, у етишмаётганини айтиб ўтди. Бу ёруғ оламдан ўтган ота-онасини кўз ёши билан хотирлар экан, уларга ота-онасидан видеотасмалар ва фотосуратлар ёдгорлик бўлиб қолганлигини айтиб ўтди ва катта экранларда оилавий видеолавҳалар намойиш этилди.
Ундан сўнг эса Мавлуда Асалхўжаева ота-онасига бағишланган қўшиғини ижро этди. Қўшиқ жаранг сочганда нафақат хонанданинг кўзларида ёш қалқиди, балки ҳамманинг кўзига ёш келиб, таъсирланди. Хонанда кўзга келган ёш ила кулиб кейинги қўшиқларини ижро этди ва барчани рақсга чорлаб туришни ҳам унутмади.
Мавлуда Асалхўжаеванинг экрандаги уч келини, Феруза Сабитова, Паризода ва Манзура ҳам ушбу куни саҳнада қайноналари ҳизматида бўлишди. Мавлуда Асалхўжаева эрка келинлари хонанда Манзура билан эса янги дуэт қўшиқларини шу куни илк марта саҳнада ижро этдилар.
Опа-сингил Асалхўжаевалардан тақдим этилган концерт дастурида мухлислар таниш ва янги қўшиқлар, дуэтлар ва гўзал кўринишдаги икки хонанданинг чиқишидан баҳраманд бўлишди.
Гўзал тарзда ўтган концерт дастури режиссёри Фарход Бадалов, хонандаларнинг концерт либослари дизайнери Дилмурод Миркамилов. Рақс ансамблларидан “Тумор”, “Паризода” ва “Жайрон” болалар жамоалари иштирок этди.
Концертдан тўлиқ фотоҳисоботни бу ерда кўришингиз мумкин.
ИЗОҲЛАР 0