Мухлисларига интизор бўлган Баҳром Назаров концертидан

Хонанда Бахром Назаров уч кун давомида «Истиқлол» санъат саройида «Интизор» номли концерт дастури билан мухлисларини шод этди.

Дастур Хайрулла Ҳамидовнинг Ватан ҳақидаги монологидан бошланиб, Бахром Назаров ижросидаги «Ўзбекистон Ватаним маним» таронаси билан давом этди.

Дастурда иккинчи куйланган қўшиқ хонанданинг ташриф қоғози бўлган «Айрилдим» таронаси бўлди. Ўзбекистон халқ шоири Рауф Парфининг қаламига мансуб «Хато қилдим» қўшиғи «Паризода» рақс гуруҳининг хиромлари остида ижро этилди.

«Кулиб деди», «Қанисан», «Изи қолди», «Қиза боқ», «Гапим бор» тароналари дастурнинг биринчи бўлимига зеб берди. Хонанда «Изи қолди» қўшиғига алоҳида тўхталиб, бу қўшиқ кўплаб мухлисларнинг талаби билан ижод қилинганлигини алоҳида таъкидлаб ўтди. Баҳром Назаров «Изи қолди» таронасини «Айрилдим»нинг укаси деб атади.

Иккинчи бўлим «Аёл» деб номланган сокин тарона билан бошланди. Хонанда бу қўшиқни айтиш мобайнида бир қучоқ гулни дастурда меҳмон бўлган аёлларга совға қилди. 

Хонанда хит даражасига чиққан «Лола, лола, лола» номли таронасини тожикчада куйлади. Хонанда мухлисларнинг илтимосига кўра дастурдан ўрин олмаган «Кечикиш» номли таронани жонли ижрода куйланди.

Хонанда ўз анъанасига кўра Ўзбекистон ва Қорақалпоғистон халқ артисти Озодбек Назарбековнинг «Нега учрашдик» таронасини ижро этди.  

Мухлислар Шукрулло Исроилов чиқишидан ҳам баҳраманд бўлдилар.

Учинчи бўлим дастурга номи берилган «Интизор» тарона билан бошланди. Кетма-кет «Ёмон эканда», «Йўқ-йўқ», «Жимбир», «Пари-пари», «Дил-у жонимдасан» деб номланган қўшиқлар жаранг сочди.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.