Муниса Ризаеванинг ёрқин шоу дастуридан

Ўзбек эстрадасида ҳозирги кунда ёрқин порлаб турган юлдузлардан бири, жарангдор овоз соҳиби ва такрорланмас услуб эгаси хонанда Муниса Ризаева куни кеча, яъни 19 октябрда муҳташам “Истиқлол” санъат саройида ижодидаги иккинчи мега-шоу дастурини мухлисларига тақдим этди. Бугун сиз азизларга илк кундан репортажни тақдим этамиз. Олдинда эса концертнинг яна икки куни бор.  Демак, ҳаммаси ҳақида бир четдан. 


Концерт карнай-сурнай садолари ва гўзал раққосаларнинг хиромлари билан бошланди. 
Севимли хонандасини кўриш иштиёқида бўлган мухлислар барча диққатларини саҳнага қаратиб турганларида, хонанда саҳнада эмас кутилмаганда концерт залнинг чап тарафда жойлашган юқоридаги Ложада “Эй само” қўшиғини ижро этиб, мухлислари қаршисида пайдо бўлди. Мухлислар барчасини кузатишга улгурмасларидан, Муниса ёрқин юлдуз сингари энди саҳнада.


Саҳнадаги декорациялар, Мунисанинг такрорланмас, ажойиб либослари ва бетакрор овози концертнинг илк дақиқаларидан барчани эътиборини саҳнага қадаб қўйди.


Шоунинг биринчи блокида, “Маҳаллада дув-дув гап” кинокартинаси лавҳалари, ҳам катта экранларда ҳам саҳнада кичик бир театр кўриниши сифатида тақдим этилди. Албатта бунинг барчаси, бош қаҳрамон шаддод Муниса Ризаеванинг дилга яқин тароналари ҳамоҳанглигида бўлди.

Муниса шаддод қизчадан, иффатли келинчакка айланди, куёв бола ролида эса Шаҳзод Муродов бўлди ва икки ижодкор ижросидаги дуэт қўшиқ “Ўжар” қўшиғи янгради ва Муниса яна ёрқин, шўх-шаддот  юлдузга айланди қолди. Бринчи блокда мухлислар хонанданинг ижодидаги энг хит қўшиқларини тингладилар ва иккита ҳаммага яхши таниш дуэт қўшиқ ҳам янгради. Концертнинг иккинчи қисми, Муниса Ризаева учун катта аҳамиятга эга ва қадрли бўлган “Ота-она” қўшиғи билан бошланди. Шоунинг бу қисмида, хонанданинг мухлислари унинг ижросидаги янги тароналарни, биринчилар қаторида тингладилар.


Муниса Ризаеванинг “Кўзларим излар” таронаси вақтида, саҳнада пайдо бўлган “Юрак” шаклидаги декорацияда икки қиз томонидан хонанданинг сурати жуда гўзал тарзда, ўхшатиб чизилди. Хонанда жўшиб, ўзининг севимли тароналарини ижро этар экан, мухлислари билан мулоқат қилишни унутмади.


Учинчи блокга ўтишдаги танаффусда эса, DJ Yamin ва Comedy uz резидентлари ўз чиқишлари билан барчани завқлантирдилар. Айниқса, Comedy uz резидентларининг ўзбек шоу-бизнеси вакиллари билан боғлиқ бўлган ҳазиллари ҳеч кимни бефарқ қолдирмади. Хонандани ҳар бир блокда антиқа, такрорланмас либосларда кўриш мумкин бўлди.

Бу қисмда эффектлар ёрдамида саҳнада Муниса Ризаеванинг клонлари пайдо бўлганлиги ва бу намойиш мухлисларни бир зумга ҳам бўлса чалғитиб қўйганлиги эсда қоларли тарафлардан бўлди. Мухлислари ёнига, залга тушиб жажжи ашадий мухлислари билан биргаликда куйлашни ҳам унутмади.


Муниса Ризаеванинг Ватанимиз ва юртбошимиз  ҳақида меҳр билан жўшиб гапирган сўзлари ва она диёримиз Ўзбекистон ҳақида куйлаган қўшиғи концертга тантанали якун ясади.
Биз эса ўз ўрнида, мухлисларни бир зумга ҳам зериктирмай, эсда қоларли ёрқин шоуни тақдим этган Муниса Ризаева ва унинг ижодий жамосига яна олдиндаги концертнинг икки кунида омад тилаб қоламиз. 


Батафсил фотоҳисобот бу ерда.