Рафет Эл Романнинг Тошкентдаги концерт дастуридан
Рафет Эл Роман
«Ўзбекистонда мени энг таъсирлантирган нарса сизларнинг самимиятингиз, ўлкангизнинг гўзаллиги, саришталиги, таомларингиз, мусиқангиз, меҳмондўстлигингиз. Ишонинг, кўп давлатларда бўламиз, турли ўлкаларда концертлар берамиз ва шуни бутун қалбим билан айта оламан, ўзбек халқидаги самимийликни мен ҳали ҳеч қаерда кўрмадим. Бу учрашув бир умр ёдимда қолади ва умид қиламанки, сиз ҳам унутмайсиз».
Концертга Рафет Эл Романнинг ҳақиқий мухлислари ташриф буюрган бўлиб, хонанда дастурни Yalancı Şahidim қўшиғи билан бошлаб берди.
Ўзбек мухлисларини қаршилар экан, Ўзбекистонга илк ташрифи эканлигини айтиб ўтди.
Хонандага унинг созандалари жўр бўлишди. Барча қўшиқлар саксофон, скрипка, гитара, барабан садолари остида жаранг сочди.
Дастурда хонанданинг «Bana Sen Lazımsın», «Elimde Değil», «Olmuyor bir tanem», «Seni seviyorum», «Kalbine Sürgün», «Affetmem» ва бошқа тароналри жаранг сочди.
Рафет Эл Роман концертда нафақат қўшиқлар ижро этди, балки ўзбек мухлислари билан самимий суҳбатда бўлди.
Рафет Эл Романнинг ашаддий мухлислари эса ўз ўрнида унинг қўшиқларини биргаликда турк тилида куйлашди. Томошабин зални чироқлар ёғдусига тўлдирди.
Хонанда ҳар бир таронани ижро этганда рақсга ҳам тушишни унутмади. Концерт давомида созандаларини ҳаётлари ва ижодларида бўлиб ўтган қизиқарли воқеалардан ҳикоя қилиб, томошабинларни кулдирди.
Турк хонандаси саҳнага ўзбек қизи Нилуфар Усмоновани таклиф этди.
Нилуфар саҳнага чиқиб, у билан биргаликда Direniyorum қўшиғини ижро этдилар. Айтиш жоизки, Нилуфар мазкур қўшиқни ўзбек тилида ўз талқинида ижро этган бўлиб, тарона «Қарай оласанми» деб номланади.
Рафет Эл Роман, Нилуфар билан мазкур дуэтни ҳеч бир репетициясиз ижро этилганини айтиб ўтди. Икки хонанда фақатгина саҳна ортида концерт бошланишига бир неча дақиқалар қолганда «тон» танлаб олганларига гувоҳ бўлдик.
Концертда Рафет Эл Роман нафақат бетакрор овоз соҳиби эканлиги, балки жуда ҳам самимий, кўнгли очиқ инсон эканлигига мухлислар гувоҳ бўлишди.
ИЗОҲЛАР 0