Райҳондан клип премьераси

Январ ойининг бошида Ўзбекистонда хизмат кўрсатган артист Райҳон Ғаниева ўзининг «Томчи» деб номланган янги таронасини мухлислар ҳукмига ҳавола этган эди. Энди эса мазкур қўшиққа суратга олинган видео клипдан ҳам баҳраманд бўлиш имконига эгасиз. Клип режиссёри Санжар Маткаримов, оператор - Рустам Муратов. Клипда бош ролларни таниқли актёр Алишер Узоқов, актриса Муқаддас Саъдуллаева ва дебютант актёр Шаҳзод Султоновлар ижро этишган. Клипни томоша қилинг ва баҳо беринг!

Райҳон:

Ушбу видеоклип жамоавий ижод маҳсули десам адашмаган бўламан. Бутун жамоа ўтириб, клип ғояси ҳақида ўз фикрларини билдирган. Клипга режиссёр сифатида таниқли клипмейкер Санжар Маткаримовни таклиф қилганмиз. Оператор Рустам Муратов. Рустам ака билан кўп йиллардан бери ҳамкорлик қилсак, Санжар Маткаримов билан бу илк ижодий ҳамкорлигимиз. Клип сюжетини уларга тўлиқ ишониб топширдик. Бу сафар ҳар доимгидан фарқли равишда, клип сюжетига умуман аралашмадим. Шу ўринда клипда суратга тушган актёрларимизга ўз миннатдорчилигимни билдириб қолмоқчиман. Суратга олиш ишлари айни жуда совуқ маҳалда бўлиб ўтди. Туннинг ярми бўлишига қарамай ҳар бир ижодкор, бор куч-ғайрати билан ишлаб, олдига қўйилган вазифани аъло даражада бажарди. Клип сюжетига тўхталадиган бўлсак, инсонларнинг бардошини синайдиган ҳодисалар ва муносабатлар тугунлари, муҳаббат мавзуси, кутилмаган якун. Умуман олганда ҳаётий бир клип суратга олишга ҳаракат қилдик.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.