Шоҳруҳхоннинг «Юлдузли» концертидан
23 май куни «Истиқлол» санъат саройида 3 кун мобайнида бўлиб ўтадиган Шоҳруҳхоннинг «Юлдузлар» деб номланган концерт дастурига старт берилди. Мазкур концерт тақдири, дастурнинг қандай даражада ўтиши йил бошидан аён эди. Нега десангиз бунинг сабаби оддий, чунки Шоҳруҳхон бу йил шоу-бизнесдаги энг сермаҳсул хонанда бўлди.
Дастурни ёш болалар Шоҳруҳхоннинг энг хит қўшиқларини ремикс турини саҳнанни тўлдириб, куйлаб бошлаб беришди. Бу эса ўз навбатида йиғилганларни ҳайратда қолдириб, давомли қарсакларга сабаб бўлди.
Саҳнага Хон чиқиши эса зални ларзага келтирар даражадаги олқишлару, қарсаклар билан тўлишига сабаб бўлди.
Шоҳруҳхон бу йилги концерт дастурини «Сўнгги қўнғироқ» деб номланган тарона билан бошлади. «Гўзалина», «Қоши қаро» қўшиқлар ва уларга тайёрланган рақслар ҳали узоқ вақт мухлисларнинг ёдидан чиқмаслиги аниқ.
Шоҳруҳхон укаси Шуҳрат Йўлдошев билан биргаликда куйлаган «Қизгина» деб номланган таронаси дастурнинг илк дуэт қўшиғи бўлди. Ушбу дуэт дастурнинг бир нафасда ўтиб кетган биринчи бўлимига якун ясади.
Шоҳруҳхоннинг бу йилги концерт дастури ўтган йилги дастурларидан ҳар бир бўлимдан сўнг танаффус вақтида соф ўзбек тилида ёзилган, шева ва лаҳжалардан ҳоли манологлар билан фарқланди.
Дастурнинг иккинчи бўлими анча-мунча шов-шувларга сабаб бўлган Жаҳонгир Аҳмедовнинг «Мажнун» фильми учун Шоҳ Машраб ғазали асосида куйланган тарона билан бошланди. Мазкур қўшиқ ажойиб, такрорланмас рақс билан янада таъсирли кўриниш касб этди.
Шоҳруҳхон ҳар йили устозларнинг қайсидир таронасини куйлаб концерт дастурида мухлисларининг эътиборига ҳавола қилар эди. Мисол учун ўтган йили Муҳриддин Холиқовнинг «Комила қиз» қўшиқғини куйлаган. Анъанани давом эттирган хонанда ушбу концерт дастурида Тоҳир Содиқовнинг «Ёғсин ёмғир» таронасини куйлади.
Кетма-кет «Нима қилиш керак», «Мен сени севаман» ва яқиндагина мухлисларга тақдим қилинган «Дарак йўқ» тароналари куйланди. Мазкур тарона эса иккинчи бўлимга якун ясади.
Дастурнинг учинчи бўлими жуда катта шов-шувли саҳна кўриниши билан бошланди. Хоннинг «Зўрсан» деб номланган клипи саҳнада қайта жонланди, манекен эса актириса Асал Шодиева бўлди.
Шоҳруҳхон қўлидаги ўйинчоқ юрагини Асал Шодиеванинг қўлига тутиши билан маникен Асалга «жон кирди» ва «Зўрсан» таронасини хонанда билан биргаликда куйлади. Буни фақат кўриш керак, таърифга тил ожиз.
Хуллас дастурнинг учинчи бўлими худди шундай бошланди. Бу бўлимда куйланган «Нигорам», «Юлдузим», «Аразлама», «Фарқи йўқ», «Шайдо қилибсен» қўшиқлар ҳам бир-биридан ажойиб ва хит тароналардан.
Дастурнинг тўртинчи бўлими «Она» деб номланган тарона билан бошланди. Шоҳруҳхон бу қўшиққа алоҳида кўриниш билан ёндошган, яъни «Мажнун» фильми саундтрекидаги кўринишни ушбу саҳна кўринишида қўллаб, кўзида оқ боғич билан намоён бўлди.
Қўшиқ юракни ўртагувчи, таъсирли ва энг муҳими чуқур маънога эга. Тарона якунида эса Шоҳруҳхоннинг кичик укаси Муҳаммад Али волидасини акасининг ҳузурига кузатиб чиқди. Хон онасига гул тақдим қилди, Зебо Наврўзова оғлининг кўзидаги боғишни ечиб, унга эзгу тилакларни тилади.
Хоннинг «Она» қўшиғидан сўнг Зебо Наврўзова ҳам битта қўшиқ куйлади. Унинг мазкур қўшиқғини мухлислар жуда яхши кутиб олишди.
Шоҳруҳхон бу йилги дастурида мумтоз адабиётдан учта ғазал куйлади. Ҳазрат Навоийнинг «Эй сабо» деб номланган ғазали ҳам шулар жумласидандир.
Шаҳзода билан биргаликда куйланган «Ало» деб номланган таронаси ҳам жуда яхши кутиб олинди.
Мазкур бўлимда «Комила қиз», «Хаёлим унда» деб номланган тароналар ҳам куйланди. Бўлимга «Йиғлама» деб номланган қўшиқ хотима ясади.
Катта маъно, мазмунга эга бўлган манологдан сўнг, бирин кетин «Сен кетма», «Божалар» гуруҳи билан дуэт ва «Юлдузлар» деб номланган қўшиқлар жаранг сочди.
«Божалар» гуруҳи билан биргаликда куйланган «Бўйдоқ» таронаси ҳар қандай эътирофларга муносиб десак муболаға бўлмас. Тарона жуда тез фурсатларда оммалашиши аниқ.
«Юлдузлар» таронаси Хоннинг 2016 йилги шоу дастурига якун ясади.
Тўлиқ фотоҳисобот бу ерда.
ИЗОҲЛАР 0