Байрам кунидаги мушакбозлик бошқа санага кўчирилди

Тошкент шаҳар ҳокимлиги тезкор хабарига кўра, Ўзбекистон Республикаси Мустақиллиги байрами муносабати билан 1 сентябр санасида ўтказилиши режалаштирилган мушакбозлик (салют отиш)нинг бошқа кунга кўчирилгани маълум қилинди. 

Бундай чора-тадбир кўрилишининг сабаби, шу куни пойтахтимизда жойлашган Бунёдкор стадионида соат 20:00да Жаҳон чемпионати саралаш босқичининг учинчи давраси доирасида футбол бўйича Ўзбекистон ва Сурия терма жамоаларининг учрашуви бўлиб ўтишидир.

Хабарда келтирилишича, икки жамоа учрашувида қарийб 35 мингдан ортиқ футбол мухлисларининг иштирок этишини инобатга олган ҳолда, шунингдек ҳамшаҳарларимизнинг боғ ва майдонлардаги байрам сайлларидан ўз уйларига қайтишлари чоғида автотранспорт оқимида тирбандликларнинг олдини олиш мақсадида, қолаверса  пойтахтимиз кенг жамоатчилиги, айниқса нуроний отахон ва онахонлар, оқсоқолларнинг таклиф ва истакларини инобатга олган ҳолда қарор қабул қилинган. 

Байрам муносабати билан бўлиб ўтадиган мушакбозлик санаси маълум қилинади. 

Шуни эслатиб ўтиш даркорки, Мустақиллигимизнинг 25 йиллиги муносабати билан ўтказиладиган байрам тадбирлари ва халқ сайиллари 1 сентябр куни бирйўла пойтахтимизнинг 12та жойида бўлиб ўтади.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.