Жинсининг Ватани Ўзбекистонми?

Жинси матосининг Ватани Америка эмас, балки Ўзбекистон эканлиги ҳақида Қорақалпоғистон ахборот агентлиги директори Есимқан Қанаатов фикр билдирди. И.В.Савицкий номидаги давлат санъат музейида сақланаётган ноёб экспонатлар ҳақида тайёрлаган мақоласида қуйидагиларни ёзган. 

Ҳозирда Нукус шаҳридаги бутун дунёга машҳур И.В.Савицкий номидаги давлат санъат музейида ноёб мустаҳкам матодан ишланган 4 дона кўк рангли кўйлак сақланмоқда. Халқ тилида бу кўккўйлак деб номланади.

Бирнеча юз йиллар аввал ҳозирги жинси каби мустаҳкам матодан қилинган ушбу бетакрор экспонатлар музейга келаётган минглаб хорижий туристларнинг ҳайратига сабаб бўлмоқда. 

Сайёҳларнинг ҳайратига сабаб бўлаётган кўккўйлак бўйича тадқиқот ишларини олиб борган олим М.Қипшақбаев қуйидаги фикрларни билдирган:

«Кўккўйлак ҳозирги jeans(жинси) материалини ёдга солади ва шу мато турининг дастлабки ихтирочиси қорақалпоқ чебарлари бўлганлигига шубҳа ўйғотмайди. Қорақалпоқларнинг қадимдан Буюк Ипак йўлида қўним топгани ва уларда савдо-сотиқ ишларининг ривожланиши бу материалнинг Европа давлатларига тарқалишига сабаб бўлса, ажабмас».

И.В.Савицкий номидаги давлат санъат музейи этнография бўлими раҳбари Айгул Пирназарова:

«Кўккўйлакнинг тарихи сак-массагетлар даврига бориб тақалади. Мард Тумарис ва довюрак Гулайим бошкарган қизлар душманларга қарши юришда кийимларининг олдига ёки совутга ажойиб нақшлар туширган. Музейга ташриф буюрган хорижий сайёҳларнинг «қорақалпоқлар жинсини америкалилардан аввал ўйлаб топишган экан. Демак, жинсининг ватани – Америка эмас, Ўзбекистон экан-да!», - деб таажжуб билан тан олишганини кўп маротаба гувоҳи бўлганман».

Кўккўйлак - Қорақалпоқ санъатининг такрорланмас эсдаликларидан бири ҳисобланиб, дунёда бошқа биронта ҳам халқда учрамайдиган тантанали либос тури саналади. Шунингдек, тасвирий ҳамда каштачилик санъатининг ҳам бетакрор намунаси сифатида талқин қилинади. Кўккўйлакни қорақалпоқларда «буёқ кўйлак» ва «каштали кўйлак» деб ҳам номлашади. Чунки бу кўйлак кўк ранг билан бўялган ва ҳар хил кашталар билан безалган. Кўйлакнинг безалишида олтмишдан ортиқ нақш турлари қўлланилган.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.