Жаҳоннинг энг чиройли арчалари

Мамлакатнинг бош арчаси — бу Янги йил байрамининг энг муҳим парчаси. Ҳар йили янги йил арафасида кўпчилик ўз уйида арча безатади. Лекин мамлакатнинг бош арчаси нафақат болажонлар, балки катталарни ҳам ўзига оҳанрабодек тортади. Бугунги шарҳимизда нафақат маҳаллий аҳоли, балки сайёҳларни ҳам ўзига жалб қилган ажойиб арчалар ҳақида маълумот тўпладик.

Париж, Франция

Париждаги Galeries Lafayette универмаги ўз гумбази остида ҳар йили янги йил арчаси чироқларини ёқади. Арча дизайни ҳар йили ўзгариб, юзлаб дунёнинг энг яхши дизайнерлари ўз ижод намуналарини намойиш этиш учун курашадилар.

Энг ёрқин ва ноодатий арчалардан бири мазкур универмаг шифтига осилган 25 метрлик тескари арчадир. Сиёҳранг конуссимон арча тилларанг декорациялари билан савдо маркази интерьерига жуда мос тушган. Бундан ташқари унга ўрнатилган LCD чироқлар ёрдамида у рангини ўзгартириш хусусиятига эга.

Вильнюс, Литва

Вильньюсдаги кафедрал бутхона майдони ва унга ўрнатиладиган янги йил арчаси кўп йиллардан буён бутун дунёдан сайёҳларни ўзига жалб қилади.  Бу йилги чироқлардан ясалган ва рангини ўзгартирадиган кўп қаватли арча ҳам дунёнинг энг чиройли арчалари қаторидан ўрин олди.

Лекин, биз ўтган йиллардаги ноодатий арчага ҳам тўхталиб ўтишни лозим топдик. Эшик ва деразаларга эга ажойиб зумрад арча мумми-троллар уйига ўхшайди.  

Нью-Йорк, АҚШ

Рокфеллер марказидаги Рождество арчаси ҳар йили жаҳоннинг энг муҳташам арчаларидан бири номини олади. Манхеттэннинг гўзал арчалари орасидан оппоқ фаришталар билан ўралган тенгсиз рождество арчаси эътиборимизни тортди.

Тайбэй, Тайвань

Декабрь ойида Тайбэй аҳолиси ва шаҳар меҳмонлари ақл бовар қилмас томошага гувоҳ бўлишлари мумкин. Ҳар куни қуёш ботгач бу ерда ажойиб чироқли шоу бошланади. Чироқли рождество арчасининг баландлиги 36 метрни ташкил қилади.

Рио-де-Жанейро, Бразилия

Бу барчаси битта арчанинг фотосуратлари бўлиб, сузиб юрувчи арча Лагоа кўлига ўрнатилган. Арчанинг баландлиги 82 метрга тенг бўлиб, дунёнинг энг баланд арчаси сифатида Гиннес рекордлар китобидан ўрин олган.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.