ФОТОШАРҲ: ТОШКЕНТДАГИ ҒАЛАБА БОҒИ
Боғ – Иккинчи жаҳон урушининг жанг даври атрибутлари қайта тикланган ёдгорлик мажмуасидир. Боғнинг турли жойларида Ўзбекистоннинг иккинчи жаҳон урушига қўшган ҳиссаси акс этган зовурлар, дала ошхоналари, темир йўл вокзали, концлагер, ҳарбий техника кўргазмаси, кутубхона ва иншоотлар барпо этилган.
Боғнинг кириш қисмида Ғалаба аркаси ва урушда беш ўғлидан жудо бўлган аёл, Зулфия Зокирова, унинг урушдан қайтмаган фарзандлари ҳамда бева қолган тўрт келини хотирасига «Матонат мадҳияси» ёдгорлик мажмуаси ўрнатилган.
Марказий хиёбонга Совет Иттифоқи қаҳрамони, генерал-майор Собир Рахимов ҳайкали ўрнатилган.
Шон-шараф музейи олтита бўлимдан иборат
Биринчиси, республикамиз аҳолисининг фронтга сафарбар этилиши, жанг майдонларидаги жасоратига бағишланган.
Иккинчиси – «Ўзбекистон – фронт учун ишончли таянч қўрғони» деб номланган.
Учинчи бўлимда уруш йилларида юртимиздаги илм-фан, таълим, маданият, соғлиқни сақлаш соҳалари намойиш этилган.
Тўртинчи бўлим «Уруш ва ғалаба ҳақида хотиралар, халқнинг қувонч ва шодлиги» деб аталган.
Бешинчисида уруш йилларидаги бадиий адабиёт, санъат ва матбуот ҳақида ҳикоя қилинган.
«Мардлар жасорати мангу яшайди» номли олтинчи бўлимдан 33 жилдлик «Хотира» китоби, шунингдек, байрам муносабати билан нашр этилган китоб-альбом ва бошқа экспонатлар ўрин олган.
«Кўз ёши» мажмуаси
Кўз шаклидаги бу бадиий мажмуада урушнинг мудҳишлиги, миллати ва динидан қатъи назар, барча одамлар бирлиги ифодаланган.
Боғ ҳудудида бир нечта мармар деворларда композицион паннолар барпо этилган. Уларда саркарда боболаримиз тарихидан лавҳалар, Иккинчи жаҳон урушига оид энг муҳим маълумотлар, миллий армиямизнинг ҳозирги жанговар ҳолати акс эттирилган. Уруш йилларидаги куй-қўшиқлар ва хабарлар асосида тарихий муҳит жонлантирилган.
Ҳарбий техникани намойиш этиш учун платформа ва байрамлар ўтказиладиган амфитеатр қурилиш жараёнида.
Лойиҳа қиймати 225 млрд. сўмни ташкил этди. Боғнинг бош меъмори Гулшоира Магометова.
Боғ ҳис туйғуларни акс эттириб - уруш даҳшати, қўрқуви, ғалаба нашидаси, эҳтиром каби туйғуларни ўзида мужассам этган, - дейди бош меъмор Гулшоира Магометова.
Янада кўпроқ суратларни фотоҳисоботимизда кўринг.
ИЗОҲЛАР 0