Президент Тошкент ерусти метроси билан танишди
Шавкат Мирзиёев «Олмазор» бекати яқинида бўлиб, амалга оширилаётган ишларни кўздан кечирди. Аҳолининг метрополитенгача етиб олиши ва метрода ҳаракатланиши учун яратиладиган қулайликлар билан қизиқди.
Шу билан бирга, давлатимиз раҳбари Яшнобод туманидаги ерусти ҳалқа метросининг қурилиши билан ҳам танишди. Шунингдек, Шавкат Мирзиёев «Дўстлик» бекатидан «Оҳангарон» бекатигача поездда бориб, ерусти метрополитенининг илк йўловчиси бўлди.
Метрополитеннинг «Дўстлик» бекатидан Қўйлиқ бозоригача бўлган 11 километрлик ерусти метроси ҳам қурилмоқда. Сергели йўналиши эса Чилонзор ерости линиясининг «Олмазор» бекатига уланади. Узунлиги қарийб 55 километр бўлган мазкур транспорт тармоғининг умумий қиймати 422 миллион доллардан зиёд бўлиб, лойиҳа беш босқичда амалга оширилиши режалаштирилган.
Ҳозирда унинг биринчи босқичи — метрополитеннинг «Дўстлик» бекатидан Қўйлиқ бозоригача бўлган 11 километрлик қисми қурилмоқда. Бу йўналишда 7 та бекат бўлади. Айни пайтда «Дўстлик-2» ва «Оҳангарон» бекатлари қуриб битказилган.
Лойиҳанинг иккинчи босқичда Қўйлиқ бозори билан «Олмазор» бекати боғланади. Учинчи бўлиб «Беруний», ундан кейин «Бодомзор» бекатигача бўлган қисм қурилади. Сўнгги босқичда эса ҳалқа метро йўли яна «Дўстлик» бекатига уланади.
Президент шу куни Тошкент метрополитенининг Юнусобод йўналишида олиб борилаётган қурилиш ишлари билан ҳам танишди. Шавкат Мирзиёев бўлажак «Туркистон» бекатини кўздан кечирди, олиб борилаётган ишлар сифати ва йўловчилар қулайлигига алоҳида эътибор қаратди.
Мазкур объектнинг умумий қиймати 103,8 миллион доллар бўлиб, қурилиш бошланганидан буён 67,5 миллион долларлик ишлар бажарилган. «Шаҳристон» бекатидан қарийб 3 километр йўл тортилиб, иккита янги станция қурилган. «Юнусобод» ва «Туркистон» метро бекатларида қурилиш-монтаж ишлари жадал олиб борилмоқда.
Қурилишга Германия технологияси ва мутахассислари жалб этилган. Сифат ва хавфсизлик ҳам Германия стандартларига мувофиқ бўлади.
ИЗОҲЛАР 0