Алишер Навоий спектакли премьерасидан

Бу йил ўзбек халқининг улуғ мутафаккири Алишер Навоий таваллудининг 575 йиллиги нишонланади. Ушбу муносабат билан юртимизда кўпгина тадбирлар ташкиллаштирилган. Ўзбек Миллий драма театри жамоаси ҳам жаҳон адабиёти, маданиятига, инсонлар бахту-саодати, халқ фаровонлиги, мамлакат ободонлиги учун улкан ҳисса қўшган сўз мулкининг султони таваллудига, «Алишер Навоий» спектаклини қайта саҳналаштирди. Ушбу спектаклнинг премьераси эса 6 феврал куни бўлиб ўтди.

Спектакль бошланишидан аввал томошабинлар қаршисига театр актёрлари Теша Мўминов, Абдурахимов Қахрамон ва Фатхулла Масудовлар чиқиб, ўз сўзларини айтдилар.  

Томошабинлар Алишер Навоий спектаклини 9 февралдан бошлаб томоша қилишлари мумкин.

Спектакллар афишаси бу ерда.

Томошабинлар ҳукмига тақдим этилган бу галги спектакль атоқли ўзбек режиссёри Рустам Ҳамидов саҳналаштирган бўлиб, премьерада янгича саҳна безакларини, ажойиб маҳоратли актёрлар жамоасини, спектаклнинг таъсирчанлигини оширган мусиқий ҳамохангликни гувоҳи бўлдик.

Томошабинга спектаклда, салтанат атрофидаги мажоралар, эзгулик ва тубанлик, адолат ва ёвузлик ўртасидаги талотумлар асносида ижодкорнинг қисмати очиб берилди. Буюк шахс, даҳо шоир, давлат арбоби, маданият ва санъат ҳомийси Алишер Навоий образи кескин тўқнашувларда кўрсатилган бўлиб, режиссёр тарихий воқеалар манзараларида ҳозирги замон билан ҳамоҳангликни, мозийда кечган воқеалар бугунги дунёда ҳам такрорланаётгани таъкидлашга ҳаракат қилган ва кўрсата олган.

Ижодкорнинг тақдири халқининг тақдири билан чамбарчас боғлиқ эканлиги таъкидланади спектаклда. Алишер Навоийнинг истеъдод – эзгулик йўлидан боришга маҳкумлиги – бу унинг илоҳий вазифаси эканлиги томошада яққол айтилган ва кўрсатилган.

Премьерада иштирок этган томошабин сифатида шуни айтишимиз мумкинки, актёрларнинг маҳоратли, ҳаққоний ижроси, саҳнадаги жонли воқеалар ривожи буларнинг баъри томошабинни бир зумга ҳам зериктирмайди. Спектаклни кўрган ҳар бир киши маънавий озуқа олиши шубҳасиз. 

Спектаклдан фоторепортаж ҳукмингизда. Унда қуйидаги ўз ишининг усталари рол ижро этганлар. 

Алишер Навоий образида, актёр Бехзод Мухаммадкаримов.

Алишер Навоийнинг суюклиги - Гули образида гўзал ва истеъдодли актриса Дилноза Кубаева. 

Улуғ шоир ва Навоийнинг дўсти Абдурахмон Жомий ролида Ўзбекистон Халқ артисти Ёқуб Ахмедов.

Хусайн Байқаро ролида - Ўзбекистон Халқ артисти Эркин Комилов.

Маждиддин ролида Ўзбекистонда Хизмат кўрсатган артист Махмуд Исмоилов. Мунажжим - Ўзбекистонда Хизмат кўрстаган артист Тохир Саидов.

Мансур образида - актёр Рихситилла Абдуллаев.

Абулвосе образида Абдураим Абдувохабов.

Энага ролида - Шохида Исмоилова.

Абдулмалих - Ўткир Менглиев.

Шайхулислом ролида - Хамид Тошпулатов.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.