Темурийлар тарихи давлат музейи

Музей экспонатлари улкан тарихий аҳамиятга эга. Булар заргарлик буюмлари, қурол-аслаҳалар, саркардалар ва оддий аскарлар кийимлари, мусиқа чолғулари, Улуғбекнинг астрономик асбоб-ускуналари ва яна кўплаб Темурийлар даврига оид маданий бойликлар. Шунингдек Амир Темур салтанатига Буюк ипак Йўли орқали кириб келган буюмлар, археологик, этнографик, нумизматик материаллар, орнаментлар ҳам экспозициядан ўрин олган. Бу ерда Амир Темур ва унинг авлодларининг европалик монархлар билан ёзишмалари каби қимматли ҳужжатлар, моҳирона ишланган миниатюралар, европалик усталар томонидан чизилган Амир Темурнинг суратлари нусҳасини ўз кўзингиз билан кўришингиз мумкин. Мазкур суратларнинг асл нусҳаси ҳозирги кунда Франция Миллий кутубхонасининг биносида сақланиб келинмоқда.