Хонанда Рухшона билан интервью

Икки фарзанднинг онаси, МY5 каналида «Бола бошидан» номли кўрсатуви бошловчиси, хонанда Рухшона бола тарбияси, турмуш ўртоғи Санжар Маткаримов, ижоди ва ҳаётида бўлиб ўтган қизиқарли нарсалар ҳақида. 

- Рухшона нега айнан болажонлар кўрсатувига бошловчилик қилишни танладингиз?

- Турмуш ўртоғим Санжар Маткаримов билан фарзандли бўлганимиздан кейин болаларни қизиқтириш, тўғри йўлга бошлаш мақсадида шу кўрсатувга қўл урдик. Болалар жуда беғубор бўлишади ва саволингизга тўғри жавоб берадилар. Айнан шу тўғри сўзлик бизнинг юзимизда таббасум югиришига сабабчи бўлади.

- Кўрсатувга болажонларни қай тарзда саралаб оласизлар?

- Болалар биринчи ўринда саралаш босқичларидан ўтишади. Бу босқичларда улар билан 5-6 дақиқа суҳбатлашсангиз, ким қандай эканлиги дарров билинади. Мисол учун бир иккита савол берсангиз шуни ўзидаёқ чаққон бола ўзини намоён эта олади. Уяладиган болалар эса гапиришга сал қийналишади. Мана куни кеча ҳам болаларни кўрсатувга танлаб олдик. Бу галги саралашда 85 нафар кичкинтойлар қатнашди ва улар ичидан 34тасини танлаб олдик. Асосан кўрсатувимизда 2 ёшдан 8 ёшгача бўлган баложонлар қатнашишади.

- Икки фарзанд онасисиз. Улар тарбиясида нималарга қатъий риоя қиласиз?

- Ўзига яраша чегаралашлар бор. Масалан ширинликларни кўп миқдорда истеъмол қилишга рухсат бермайман ва бошқа оналар каби барча оддий қоидаларга амал қилишга ҳаракат қиламан.

- Сизнинг фикрингизча фарзандларни доим эркалатиш керакми ёки қандайдур бир даврдами?

- Менимча эркалаш керак, лекин меъёри ҳам бўлиши зарур. Болага қаттиққўлроқ бўлиш лозим деб ўйлайман, чунки ўзимни ҳам айнан шундай тарбиялашган.

- Турмуш ўртоғингиз Санжар акадан шу кунгача ҳануз хафа бўлиб, ранжиб эслайдиган қандайдур воқеа бўлганми?

- Биласизми, менинг характеримнинг қизиқ бир тарафи бор, буни ҳатто яхши ҳислат десам ҳам бўлади. Масалан турмуш ўртоғим билан хафалашиб қолсам 15 дақиқадан сўнг, ҳеч нарса бўлмагандек суҳбатлашиб кетавераман. Унутиб юбораман барча гиналарни. Энди бундай вазиятлар менимча ҳар битта оилада бўлади. Бир-биримизни тушунишга ҳаракат қиламиз доим.

- Ижод билан боғлиқ бўлган қийинчилик ёки бўлган воқеалар ҳақида гапириб берсангиз.

- Ижодим давомида қийинчилик кўрдим деб айта олмайман. Чунки баъзида ҳайрон қоламан, устоз санъаткорлар ўзларининг кечинмаларини гапириб беришса, ҳақиқатдан ҳам шунча нарсани бошларидан ўтқазишган эканда деб қоламан. Лекин клип съёмка жараёнида қийинчилик бўлган, бу соғлиғим билан боғлиқ бўлган ўша вақтда.  

«Севасанми мени» клипини суратга олиш жараёнида хонанда кўричакнинг кучли оғриғи билан суратга тушишга мажбур бўлган. 

- Рухшона илк клипингиз учун маблағни қаердан олгансиз?

- Кўпчиликнинг хабари бор, ўзи 2009 йилда Akfa Media продюсерлик марказида илк ижодимни бошлаганман. Биз ёнимиздан маблағ клипларга сарфлаган эмасмиз. Продюсерлик маркази 3 йил давомида барча қўшиқ ва клипларнинг ҳаражатини ўз бўйнига олган.

Рухшона рус тилида шеър ёзади. Рус тилидаги тароналарининг матнини хонанда ўзи ёзган. 

- Рухшонанинг ички олами қандай? Рухшона экранда, саҳнада кўринганидек инсонми ёки буткул ўзгача инсонми?

- Тўғриси ўзимга баҳо бера олмайман, экранда ва ҳаётда қандай эканлигимни ён атрофимдаги инсонлар кўпроқ билишади. Характеримда албатта шўх-шаддодлик бор. Керакли вақтда эса ўзимни тутиб ҳам тура оламан.

- Рухшона нимадан қўрқади бу ҳаётда?

- Ҳаётда барча она ва рафиқалар каби болаларим ва турмуш ўртоғимга бирон-бир ёмонлик бўлишидан ҳавотир оламан албатта.

- Ижодда қандай қатъий принципларингиз бор?

- Аввалам бор қаттий принципларимдан бири бу камтарин ташқи кўринишга эга бўлиш. Менимча санъаткор ва она бўлганингиздан кейин ўзингизни босиб олишингиз керак. Ташқи кўринишга эътибор бериб, ҳуш муомалали бўлиши лозим деб ўйлайман.

- Ошхонада Рухшона нималарга жуда ҳам уста? Нималарни ҳали ҳам қилишни билмайди?

- Ошхонадан Рухшонани чиқмайдиган одати бор (кулади). Пишириқларга сал қийналаман. Тортларнинг бисквитини қиламан, лекин ҳар гал чўкиб қолади ва ниҳоят 3 ҳафта олдин ўхшади тортим. Ҳурсандчилигимни кўрсангиз эди.

Мактаб даврида рақс ва вокал йўналиши бўйича танловда иштирок этган ва вокал йўналиши бўйича биринчи ўринни эгаллаб, телефон ютиб олган. 

- Сизни йиғлатиш осонми?

- Осон, жуда ҳам осон. Кўпчилик ишонмайди, чунки ҳамиша яхши кайфиятда бўлишга ҳаракат қиламан. Уйда эса мени йиғлатиш жуда ҳам осон.

- Хали ҳеч ҳам яккахон концерт дастурингизни тақдим этмагансиз. Режада борми?

- Режада бор, лекин ҳали эрта деб ўйлайман. Чунки яккахон концерт бериш учун халқ эътиборини қозонишингиз керак. Ярим тўлган зал билан 2 кун концерт бергандан кўра, озроқ кутиб одам тўла залга концерт берган яхши деб биламан.

1000та расмларидан қилинган пазл шаклидаги портрети у учун мухлис томонидан тақдим этилган унутилмас ҳадялардан бири бўлган.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.