Юлдуз билан бир кун: актриса Юлдуз Ражабова

Биз фурсатдан фойдаланиб Юлдуз билан суҳбатлашдик. 

– Эрталаб неччида уйғонасиз?

– Қачон ётишимдан қатъий назар, ҳар тонг соат 7:00-7:30да уйғонишга одатланганман. Чунки соат 8:30да «Дийдор» театр студиясида репетиция бор. Ундан сўнг агар суратга олиш ишлари бўлса съёмкага, агар бемалол бўлсам ўқ отиш машғулотига бораман. Кечқурун халқ хизматидамиз. Тўй тантаналарида бошловчилик қиламан.

– Кунингиз нимадан бошланади? Нонушта қиласизми?

– Куним кийим йиғишдан бошланади. Тунда шу ишни қилиб ётмаганим учун эрталаб туришим билан керакли либосларимни йиғишга тушаман. Суратга олиш ишлари учун тўй хизматлари ва бошқа нарсалар учун. Деярли ҳеч қачон нонушта қилмайман. 

– Тетик ва бардам бўлиш учун суткада неча соат ухлашингиз керак?

– Камида олти соат ухлашим керак.

– Парҳез қиласизми?

– Йўқ, парҳез қилмайман.

08:30 Юлдуз театрда репетицияда

У ҳар куни, тунда қайси вақтда ётишидан қатъий назар, соат 07:00да уйғонади. Деярли ҳеч қачон нонушта қилмайди. Ҳар куни 08:30 «Дийдор» театр-студиясида Баҳодир Йўлдошев саҳналаштирган «Юлдузли тунлар» спектаклининг репетициясида иштирок этади. Актриса мазкур спектаклда Хонзодабегим образини гавдалантирган. 

– Дийдор тетарида «Юлдузли тунлар» спектаклида роль ижро этгансиз. Режиссёр Баҳодир Йўлдошев ҳақида фикрларингизни ва шу спектакль ҳақида айтиб ўтсангиз.

– Баҳодир Йўлдошев ҳақида олдин жуда кўп эшитган эдим. Уларнинг саҳналаштирган спектаклларини кўрганман, катта майдонларда уюштирган тадбирларида қатнашганман. Улар ҳар томонлама мукаммал инсон. Ҳам инсон сифатида, ҳам ижодкор сифатида. Яна улар жуда яхши психологлар. Кўзингизга қараб ичингиздаги дардни, муаммони ўқий оладилар. «Юлдузли тунлар» спектакли ҳақида гапирадиган бўлсам, аввал ҳам кўп бора бу асарни ўқиганимга қарамай, бу спектаклда ўйнаганимдан сўнг уни янада чуқурроқ англаб етдим. Бу асарни ўзимиз учун бошқатдан кашф этдик. Бобур Мирзонинг ички кечинмалари, уларнинг ўша даврдаги муаммолари, ҳис-туйғулари. Умуман бошқа оламга кириб келасиз. Томошабинлар ҳам келиб, гувоҳи бўлиши мумкин, театрга қадам қўйгандан, декорация, мусиқа, ердаги тўшалган гиламлар, пардалар, хуллас томошабин ҳам бошқа дунёга тушиб қолади.

«Жуда ҳам бетартибман. Уят бўлса ҳам айтаман, саранжом эмасман. Эрталаб туриб нимани қаерга қўйганимни эслай олмай, ҳамма ёқни ағдар-тўнтар қиламан. Онамдан унимни кўрмадингизми, буним қаерда деб сўраганим-сўраган»

11:00 Актриса фильм съёмкасида

Юлдуз ҳозирги кунда янги фильмда суратга тушиш билан банд. У режиссёр Нозим Тўлахўжаевнинг «Ёлғон гирдоби» номли фильмида бош ролни ижро этмоқда. Ҳар куни тасвирга олиш ишлари билан машғул.

– Кунингизни маъмурингиз билан режалаштирасизми ёки ўзингизми?

– Ҳар куни маъмуримга қўнғироқ қилиб, бугун нималар режалаштирган эдик деб, сўраб оламан. Мен унутиб қўйишим мумкин, шунинг учун у барача режалаштирилган ишларни қайд қилиб боради.

– Тўйларда бошловчилик қиласиз. Бу сизнинг асосий даромадингиз манбаими ёки қўшимча?

– Бу қўшимча даромад манбаи. Асосий даромадим съёмкалардан оладиган гонорарларим.

– Бошловчилик хизмати учун қанча ҳақ оласиз?

– Айтмасам бўлмайдими?! Майли, айта қолай, 300 АҚШ доллари атрофида.

– Фильмларда роль ижро этиш учун қанча гонорар талаб қиласиз?

– 2-2.5 минг АҚШ доллари атрофида сўрайман, лекин улар кесишга ҳаракат қилишади.

– Театр ва Кино. Иккаласининг ҳаётингиздаги ўрни?

– Театр ҳам, кино ҳам ҳаётимда катта роль ўйнайди. Лекин театрнинг ўрни бўлакча. Бу ерда гап пулда ҳам, гонорарда ҳам эмас, балки ижодий ўсишда. Театр бир қолипга тушиб қолмаслик учун катта ёрдам беради. Моддий манфаат туфайли эмас. Кинода картинага қараб, давлат буюртмаси асосида ишланаётган фильмларда ҳақиқий ижод бор. Жамоа ҳам, сценарий ҳам, барчаси жуда пухта ўйланади. Хусусий кинода булар йўқ демоқчи эмасман. Яхши хусусий кинолар ҳам бор, лекин кам. Шахсан ўзим давлат буюртмаси асосида суратга олинадиган фильмларда мазза қилиб ўйнайман. Гонорари кам бўлишига қарамай, ижодий потенциалимизни юзага чиқаришимизда катта ёрдам беради. 

Мактаб даврида жуда ҳам ёпиқ қиз бўлганман. Ўз қобиғимга ўралиб, атрофдагилардан бекиниб юргим келар эди. Балки бунга сабаб синфдошларим тарафидан ажратилганим бўлса керак. Сабабини тушуна олмас эдим, менимча жуда ҳам оддий оиладан бўлганим, ўта содда кийинганим учунми, хуллас мен мактаб вақтида ажратиб қўйилганман.

«Аэропланда учиш энг катта орзуларимдан бири. Қийинчиликлардан қўрқмайман, аксинча яхши кўраман. Барча тўсиқларни енгиб ўтиб, мақсадимга эришиш учун курашаман. Ҳозир суратга тушаётган фильмимда альпинист ролини ижро этаяпман ва чўққига чиқиш жараёнида ўзим суратга тушдим. Мен учун бундай машғулотлар завқли. Худо хоҳласа, энди аэропланда учиш ниятим бор»

«Одамларнинг табақаланиши ва ажратилишидан нафратланаман. Ўзим ҳам афсуски, бунга кўп бора дуч келганман. Ҳаттоки илк муҳаббатимдан ҳам шу туфайли айрилганман. Молиявий томонлама бир-биримизга тўғри келмаганмиз»

Ўлим хабари ва йиғи-сиғиси менда даҳшат уйғотади. Бу менинг фобиям. Болалигимда холам вафот этган. Ўша вақтдаги йиғи-сиғи ва айю-ҳаннос хали-ҳануз қулоғим остида жаранглайди. Ўша пайтдан бери ўлим хабаридан қўрқиб қолганман. Қўни-қўшниларда ҳам ўлим сабабли шовқин-сурон бошланиб қолса, хонамнинг бурчагига бекиниб оламан.

15:00 Юлдуз ўқ отиш спорти машғулотларида

«Айнан шу спорт турига жуда қизиқаман. Ўз олдига мақсад қўйиш ва унга эришиш мисолини шу спорт орқали кўриш мумкин»

– Нега отиш спортига қизиқасиз? Нега айнан шу спорт тури?

– Буни бир оғиз гап билан тушунтириб бера олмайман. Анчадан бери шунга ўхшаш нарса билан шуғуллангим келиб юрардим. Ва ниҳоят мақсадимга эришдим, шуғулланадиган жой ва мураббий топдим. Айнан шу спорт тури орқали мақсад қўйиш ва унга эришиш мисолини кўрсатиш мумкин. Отиш спортида нишон олиш ва уни ишғол қилиш керак. Ҳаётда ҳам инсон бирон маррани кўзлаб яшайди. Шу спорт тури орқали мақсад сари интилишни ўрганиш мумкин.

– Қайси актёрлар билан фильмда ишлаш сизга қулай?

– Йигитали, Адиз ака, Улуғбек ака, умуман бирга суратга тушган барча ҳамкасбларим билан қийналмай ишлайман. Шу кунгача бир марта ҳам ўзимга партнёр танламаганман. Ҳамма билан тил топишишга ҳаракат қиламан.

– Ота-онангиз ҳақида оилангиз яқинларингиз ҳақида гапириб беринг?

– Онам ҳозирда уй бекаси. Отам журналист. Акам бор. Компьютер дизайнери бўлиб ишлайди. Кичкинагина оиламиз бор.

Актриса бўш вақт топди дегунча, ўқ отиш спорти машғулотларига боради. Мазкур спорт сирларини Юлдузга, спорт устаси номзоди Эсанбаев Азизбек ўргатади.

Онам билан барча мавзуда сирлаша олишимга қарамай, ҳеч қачон юзма-юз суҳбат қура олмайман. Бизнинг ўртамиздаги восита – СМС. Ҳа-ҳа, онам билан телефон ёки СМС орқали сирлашаман. Юзма-юз келганда, салом бериб, қочиб қоламан. Билмадим нимага, лекин жуда ийманаман. Ҳаттоки яхши кўришимни, соғинишимни ҳам телефон орқали изҳор қиламан. Шу одатимдан қутулишни эса орзу қиламан.

Тўй тантанасида хизмат қиладиган барча машҳурлар каби Юлдузни тўйга боришдан олдин гўзаллик салонига ташриф буюрганига гувоҳ бўлмадик. Билсак бунинг сабаби, у гўзаллик салони хизматларидан камдан-кам фойдаланар ва ўзи пардоз қилар экан.

– Кўпгина тадбирлар, маросимларда иштирок этасиз. Образингизни яратишда қайси гўзаллик салонларига мурожаат қиласиз?

– Деярли гўзаллик салонлари хизматидан фойдаланмайман. Пардоз ва соч турмакларимни ўзим қиламан. Фақатгина реклама роликларида қатнашсам, уларнинг ўз стилисти бўлса, фойдаланишим мумкин.

19:00 Юлдуз тўй тантанасида хизматда

«Оқшом тушиши билан тўй хизматларига чопамиз. Ўзбегимнинг тўйи кўп, уларда хизмат қилиш биз учун фахрли»

«Мактаб пайтида лақабим «терак» бўлган. Болалигимда бўйим жуда ҳам баланд бўлганлиги боис, болалар устимдан доим кулишган. Иложи борича бўйимни пастроқ кўрсатишга ҳаракат қилар эдим. Шу сабабли қаддим сал букилиб қолган ва ҳалигача букчайиб юраман. Энди ўйлаб қарасам, бўй-бастимдан уялишим эмас, аксинча фахрланишим керак экан» 

– Бухоро, Самарқанд, Хива қай бири кўпроқ сизга ёқади?

– Бухоро. Биринчи сабаб Навоийга яқинлиги бўлса керак. Ундан ташқари жуда қадимий, гўзал шаҳар.

– Саёҳат сиз учун нима? Яқинда дугонангиз билан саёҳатда бўлдингиз адашмасак?

– Саёҳат қилишни жуда яхши кўраман. Саёҳатда бутун муаммоларни унутиш мумкин. Ундан ташқари ҳар бир саёҳат ҳаётингизга қандайдир янгилик олиб киради. Дунёқарашингиз ўзгаради.

– Инстаграмда Юлдуз Ражабова Official номи остидаги профиль бор, ўзингиз юритасизми? Гоҳида ҳаёт ҳакидаги фикрларингиз, постларингиз бир оз тушкун мавзуларда. Ҳозирда Юлдуз қандай кайфиятда?

– Ҳа, бу профилни ўзим юритаман. Аслида, ижтимоий тармоқларда унчалик ҳам фаол эмасман. Инстаграмда ҳам асосан атрофдаги ҳодисалар, юрагимга ботган нарсалардан келиб чиқиб пост қиламан. Бўлар-бўлмас сабаблар туфайли пост қилишни ёқтирмайман. Агар бирон-бир ҳодиса қалбимга оғир ботса, ички кечинмаларимни баён қиламан пост орқали.

– Сизни хафа қилиш осонми?

– Жуда ҳам осон. Битта гап билан ҳам хафа қилиш мумкин.

– Тез кечирасизми?

– Лекин кечиришим ҳам осон. Кек сақлаб юрмайман.

– Ўзингиз ижро этган роллардан кўнглингизга яқинлари қайси?

– «Ёмғир остида» ва «Зарб» кинокартиналаридаги ролларим ўзимга жуда ёқади. «Ёмғир остида» кинокартинасидаги яратган образим ўзимга яқинроқ. Мен ҳам ёшлигимда, мактаб даврида ўша қаҳрамоним сингар атрофдан яширинишга, қобиғимга ўралиб олишга ҳаракат қилардим. Зарб картинасига келадиган бўлсак, жуда ҳам чуқур маъноли фильм. Инсон тез илғаб ололмайдиган матн ва ғояларга бой картина.

– Қайси ҳамкасб актрисаларнинг актрисалик маҳоратини юқори баҳолайсиз?

– Ўз тенгқурларимни назарда тутаётган бўлсангиз... (узоқ танаффусдан кейин) Севара Солиева.

– Ҳамкасбларингиз орасида ҳақиқатда яқин ишонган дўстим ёки дугонам бор дея оласизми?

– Зара Ширинова. Энг яқин дугонам. Доим бир биримизни қўллаб-қувватлаймиз. Қандай ёрдам керак бўлса, аямаймиз. Сирларимизни бўлишамиз.

– Ҳаётингизда айни дамда яқин инсонингиз борми? Турмушга чиқиш мавзуси бўйича кўпчиликдан савол бўлса керак? Оила қуришни ўйламоқдамисиз? Турмушга қачон чиқасиз?

– Афсуски, йўқ. Жуда ҳам хоҳлайман елкадошим бўлишини. Худо хоҳласа, бўлиб қолар.

– Севганмисиз?

– Севганман. Лекин оилавий тафовут, айнан молиявий тарафлама бўлган тафовут туфайли бирга бўла олмадик. Бирга бўлишимизга йўл қўйишмади.

– Турмуш қуриш учун севиб қолиш шартми?

– Турмуш қуриш учун ўша инсон сеникилигини англаб етиш муҳим. Севги вақт ўтиб келиши мумкин. Лекин у инсоннинг кўзларига қараб, айнан сенинг инсонинг эканлигини англаб етсанг, турмуш қурса бўлади.

– Эркакларда кандай хислатларни ҳурмат қиласиз? Бўлажак турмуш ўртоғингиз қандай хислатларга эга бўлиши керак?

– Эркак, авваламбор, эркак бўлиши керак. Ҳимоячи бўлиши керак. Яна мен учун муҳим шартлардан бири, дунёқараши кенг бўлиши керак. Қайси соҳада бўлмасин суҳбат қура олиши керак. Бир нарсаларни жон куйдириб гапириб берсанг, ёнингдаги инсон ҳеч нимани тушунмай бошини қимирлатиб ўтирса, бу жуда ёқимсиз.

– Инсон бахтли бўлиши учун нималар керак деб ўйлайсиз?

– Инсон бахтли бўлиши учун менинг назаримда бахтли эканини ҳис қилиши керак. Борига шукур қилиб яшашни ўрганиши керак.

– Сиз бахтлимисиз?

– Бахтлиман. Авваламбор, ота-онамнинг борлиги мен учун катта бахт. Улар менинг энг катта бойлигим. Тушкунликка тушганимда доим қўллаб-қувватлаб, ўша ҳолатдан чиқиб кетишимга кўмаклашадилар.

 

Шунингдек, очиқкўнгил, қувноқ ва жуда ҳам самимий инсон, эстрадамизнинг ёрқин юлдузларидан бири Умидахон билан самимий интервьюни сайтимизда ўқинг.