Шохруҳхоннинг романтик руҳдаги концертидан

Ҳушовоз ва минглаб мухлисларнинг севимли хонандаси Шохруҳхон «Истиқлол» санъат саройида «Ёнингдаман» номи остида янги концерт дастурини тақдим этди. 9 февраль куни старт берилган концертида хонанда мухлисларини нималар билан шод этгани ҳақида батафсил қуйида.

Концерт динамик мусиқа ва раққослар жамоасидан тақдим этилган рақслар билан бошланди.

Ва хонанда саҳнада «Алдамадим» таронасини ижро этган ҳолда мухлислари қаршисида пайдо бўлди. Қўшиқ жаранг сочган вақт эса зал бўйлаб «муҳаббат фаришталари» мухлисларга хонанда сингари ўз меҳрларини улашди.

Саҳна бу сафар учта геометрик шаклдаги экранлар билан жиҳозланганлигини кўриш мумкин бўлди.

Жуда ҳам тортинчоқ хонанда бу сафар мухлислари билан бутун концерт давомида самимий мулоқатда бўлди.

Дастурнинг биринчи қисмида Шохруҳхоннинг барчамизга яхши таниш қўшиқлар жаранг сочди. Улар қаторида «Қўғирчоқ», «Апрель-май», «Менга фарқи йўқ», «Нима қилиш керак» тароналари куйланди.

Қўшиқлар аранжировкаси янгича талқинда бўлиб, «Комила қиз» испанча услубда тақдим этилди.

Ҳар бир қўшиққа Zlotnikov Dance Centre ва «Тумор» рақс ансамбллари гўзал рақслар ва саҳна кўринишларини ижро этишди. Хонанда ҳам улардан қолишмаган ҳолда саҳнада эркин ҳаракатланиб, рақсга тушди.

Шохруҳҳон мухлисларини бу йилги дуэтдошлари билан ҳайрон қолдирди. Концертнинг иккинчи қисми Нилуфар Усмонова билан «Барча шодлик сенга бўлсин» дуэт тарона билан бошланди. Ижодкорлар иштирокида оилавий ҳаётдан саҳна кўриниши ҳам тақдим этилди. Позитив руҳдаги қўшиқ барчага манзур бўлди.

Опера хонандаси Женисбек Пиязов билан ижодий ҳамкорлик, Шохруҳхоннинг мухлисларига буткул кутилмаган совға бўлди. Икки истеъдод ижросидаги «Соғиниб» қўшиғи барча соғинган қалблар учун бағишланди.

Шохруҳхон ва Зиёдадан тақдим этилган «Йиғлама» дуэт таронаси навбатдаги туҳфалардан бўлди.

Хонанда доим устоз санъаткорлар ижодига мурожаат этиб, улар ижодидан қўшиқ куйлайди. Бу сафар хонанда Абдурауф Олимовнинг «Турфа гуллар» қўшиғини ўзгача талқинда ижро этди.

Қўшиқдан сўнг, Волидасига ўғиллик меҳрини изҳор этган ҳолда гулдаста совға қилди.

Шунингдек, марҳум устоз санъаткор Мухриддин Ҳолиқовнинг «Қиз бола» қўшиғини ўз талқинида ижро этди. Хонанда бундан аввал ҳам унинг бир қанча қўшиқларини ижро этган.

Хонанда барча клипларининг биринчи томошабини Волидаси эканлигини айтиб ўтиб, «Маликам» қўшиғига суратга олинган клипни Волидаси ва мухлисларига илк бора концертда намойиш этди.

Хонанда саҳнада қўшиқ куйлаётган вақтда чироқлар ўчиб қолиши бир зумга барчани шошириб қўйди. Аммо хонанда раққослар билан фонарлардан гўзал кўриниш ва рақс тақдим этишди.

Хонанда концертда янги тароналарини тақдим этишни унутмади. Улардан бири «Севгилим» қўшиғи бўлди.

Шохруҳхон Жаҳонгир Позилжонов билан эса бутун зални кезиб «Бойландим» қўшиқларини ижро этди.

Албатта доимий ижодий ҳамкори мафтункор хонанда Шаҳзода билан ҳам Шохруҳхон янги дуэт куйлади. Шохруҳхон, Шаҳзодани битта қўшиқни ижро этиб кетишга йўл қўймай, «Шошма» дуэт тароналарини ҳам ижро этдилар.

Концерт меҳр-муҳаббатга тўла ва самимий руҳда ўтди.

Концертнинг илк кунида шоу-бизнес вакилларидан Даврон Кабулов ва рафиқаси, Шарқ гуруҳи, Санжар Ҳолиқов, бошловчи Лазиза Нозимхонова, Хусан Жураев, Ойхон Ифорзода ва Шох Алимовичлар концертга ташриф буюришди.

Концертдан барча суратларни бизнинг фотоҳисоботда кўришингиз мумкин. 

 

Публикация от kunutun.uz (@kunutun.uz) Фев 9, 2018 в 9:02 PST

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.