Согдиана Хивада клип суратга олди

Ҳозирда Россияда яшаб, ижод қилиб келаётган ҳамюртимиз хонанда Согдиана ўзининг янги «Неделимы» деб номланган таронасига юртимизнинг гўзал гўшаси Хивада клип суратга олдирди. 
 

Мазкур таронага ишланган видео кетма-кетликни ўз ишининг устаси, маҳоратли клипмейкер Ёдгор Носиров суратга олди. Суратга олиш ишлари 12 август куни Хива шаҳрида бошланиб, икки кун давом этган.

ХОНАНДА СОГДИАНА:

«Ёдгор Носировнинг олдига мен отам билан клип олдиришга келганман. Бу воқеа «Фабрика звёзд» кўрсатуви бошланмасидан олдин бўлган. Шу билан мен танловда қатнашиш учун учиб кетганман. Клип эса қолиб кетган. Бу воқеага 12 йил бўлибди. Мен бу истеъдодли инсон билан ишлаш бахтига муяссар бўлганимдан жуда ҳам хурсандман. Клипни декорациялар ёрдамида суратга олишни хоҳламадик, бизга ҳақиқий шарқ ва унинг тарихи керак эди. Шунинг учун клипни Хивада суратга олишга қарор қилдик. Суратга олиш жараёни мен учун жуда қизиқарли бўлди. Қолаверса, барча ўз ишига маъсулият билан ёндашди. Бу эса иш жараёнида жуда ҳам муҳим».

ЁДГОР НОСИРОВ, РЕЖИССЁР:

«Клип бошида сюжет йўналишида суратга олиниши керак эди, аммо баъзи бир сабабларга кўра, клипимизни трек йўналишида суратга олдик. Клип давомида Согдиана 3та образда намоён бўлади. Клипнинг премьера санаси ҳали аниқ эмас, чунки унинг устида ишлашимиз керак. Қолаверса, компьютер графикасидан ҳам фойдаланамиз. Ўйлайманки, сентябрь ойининг бошларида Согдиананинг мухлислари бизнинг ижод маҳсулимиздан баҳраманд бўлишлари мумкин бўлади».

Қўшиқ шеъри ва мусиқаси Алексей Малахов қаламига мансуб. Клипни суратга олишда Жаҳонгир Ибрагимов ўз меҳнатини аямаган.

Согдиананинг клипдаги образи устида таниқли стилист, Россиянинг Первый каналидаги «Модный приговор» кўрсатувининг бош стилисти Алексей Сухарев ишлади.

Визажистлик вазифасини эса Лидия Андре бажарди. 

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.