Гимнастикачиларимиз Осиё чемпионатида

Таиландда Бадиий гимнастика бўйича Осиё чемпионатига старт берилди.

Йирик спорт форуми эса Ўзбекистон жамоаси учун ёқимли бошланди. Делегациялар йиғилишда, тантанали равишда, Ўзбекистон вакилларига гимнастикачи қизларимизнинг совринлари топширилди.

Эслатиб ўтамиз, 2017 йилда бўлиб ўтган Қитъа биринчилигида бизнинг қизларимиз кумуш медалларни қўлга киритишган эди, олти медаллар эса қозоғистонлик спортчиларга насиб қилган. Лекин антидопинг қоидаларига кўра спортчи қизлардан олинган қон намуналарида Қозоғистон вакилларининг қонида таъқиқланган моддалар борлиги аниқланган ва уларнинг натижалари бекор қилинган. Олтин медаллар эса Ўзбекистон вакиллари Анастасия Сердюкова, Сабина Ташкенбаева, Нуриниссо Усмонова ва Анора Давлатоваларга топширилган.

Ҳозирда бўлиб ўтаётган чемпионатда Ўзбекистондан Сабина Ташкенбаева, Екатерина Фетисова ва Нуриниссо Усмоновалар якка баҳсларда, гуруҳ баҳсларида Нилуфар Шомуродова, Динара Равшанбекова, Софиябону Қасимова, Камола Ирназарова, Ксения Александрова ва Севара Сафоевалар кураш олиб борадилар.

Шунингдек ўсмир қизлар ўртасида Ёсмина Рахимова ва Тахмина Икромова якка кураш баҳсларида, Аъзамова Нилюфар, Абдуллаева Камила, Ким Виктория, Ирназарова Мадина, Исхакзода Мумтозабонудан иборат жамоа эса гуруҳ баҳсларида ўз маҳоратларини намойиш қиладилар.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.