Тошкентда қиличбозлик бўйича жаҳон чемпионати бўлиб ўтади

2015 йилнинг 1-9 апрел кунлари пойтахтимиз Тошкент шаҳрида, Халқаро Қиличбозлик федерацияси қарорига биноан ўспиринлар (кадетлар) ва ўсмирлар ўртасида қиличбозлик бўйича жаҳон чемпионати бўлиб ўтади. 
Ўспиринлар (кадетлар) ва ўсмирлар ўртасида ўтказиладиган мазкур жаҳон чемпионатига олиб борилаётган тайёргарлик ишлари билан яқиндан танишиш мақсадида Халқаро қиличбозлик федерацияси бош котиби Фредерих Петрушка бошчилигидаги делегация юртимизга ташриф буюрди.
 

 

Петрушканинг сўзларига кўра, ушбу  жаҳон чемпионатини ўтказиш учун дастлаб 5 давлат даъвогарлик қилди. 2014 йилнинг 21 ноябрь куни Рим шаҳри (Италия)да ўтказилган Халқаро қиличбозлик федерациясининг Конгрессида мезбонлик учун ўз номзодини қўйган давлатларнинг тақдимотлари кўриб чиқилди. Таъкидлаш жоизки, овоз бериш жараёнида 111 нафар мутахассисдан 108 нафари Ўзбекистон учун овоз берди. Шунингдек, меҳмонлар мусобақалар ўтказиладиган “Ўзбекистон” ҳамда “Универсал” спорт саройларини кўздан кечириб, бу ерда яратилган шароитлар билан яқиндан танишди.
Жаҳон чемпионатида 100 дан ортиқ давлатдан минг нафардан зиёд ўғил-қизлар ғолиблик учун кураш олиб боради. Унда Ўзбекистон терма жамоаси тўлиқ таркибда иштирок этиши режалаштирилган. Жаҳон чемпионатига доир маълумотлар билан махсус ташкил этилган www.tashkent2015.uz сайти орқали танишиб бориш мумкин.